咱教育部臺灣台語語言能力認證今(114)年第1擺的考試（包含A、B、C卷）都也佇3月考過矣，聽候4月28就會公布成績。8月是第2擺的考試，按算8月初2（拜六）考A卷電腦化測驗；8月初3（禮拜）會考B卷。8月這擺考試的報名時間，對114年4月14早起9點開始，到5月初9下晡5點。報名的人無限定身份佮年歲，凡若有興趣的，攏會當上網報名。總是，1个人就干焦會當報1卷爾(niâ)，咱欲報名著較斟酌咧，張持袂蝕本。報名費250箍，19歲以下的通優待免抾錢。考試彼工，所有測驗的項目（聽、講、讀、寫4項）若考攏有齊著的，阮猶有攢1份紀念品欲來相送喔。

　　若有猶未讀冊的細漢囡仔（6歲以下）抑是歲頭較濟（65歲以上）的人欲考A卷（書寫測驗猶有用紙筆考），感覺家己若攏用電腦考試加減會有困難的，嘛通申請特別服務。詳細的說明請看刊佇考試網站（https://ttg.moe.edu.tw）頂懸的簡章內容。為著欲予考生適應用電腦考試，教育部嘛有佇考試網站安一个「電腦化測驗線頂模擬平台」（https://ttg.moe.edu.tw/tmt_demo），才請考生有閒通較捷來試用看覓咧。

　　教育部對99年開始辦認證考試，到今報名總人數都也有22萬1,996人囉。咱若按今年3月報名的資料共看，猶是學生族群報名的人上濟，有9,039人，報名率占總額的5成較加。向望未來有閣較濟的少年家通相招來學咱在地的本土語，本土語欲生湠有恁鬥相伨的確會有卜面。

　　相關考試的資訊，已經有刊佇認證考試的網站矣，咱看「最新消息」就查會著。若猶有其他考試相關的問題，才請聯絡承辦單位國立臺灣師範大學。服務專線：0800-699-566、(02)7749-3664；嘛有服務信箱：ttg.sce@deps.ntnu.edu.tw。

<簡章如附件＞